Hillor pojjan(হিলর্ পজ্জন)

পরান্নো, সংসারর বেক দুকআনি মরে দি জা সুক্কানদোই তুই ফিরি জা, তুই সুগে থেলে মুইও সুগি ন কোম আর কোচপনা দি জা।

পর্বোয়া, ভাজে ধোয় মন দুক-আভিল্যাচ দার (শান) গর’ মন হিলর মাদি বলা বুঝোদোক শুকুনর দল। জাদর শুত্রুউনরে মার’ তেগ’ ঘুম যেবার নেই অক্ত এগাচিত্তে - এগামনে লাম’ জাত উদ্দোর কামত।

মোন কানের, ছড়া কানের - কানের চাদেগাঙ চেরো কিত্তে মরা কিজেক বোমার আগাচ পাদাল। রেত্তো অলে বেরেচ কানন, ঝক  পরন তদেক, জাদর পাত্থলি দাগি কর, বাংলাদেজর আদি মানেইউন, অলর গরি এ দেচ সারি ধেই যাদন অন্য দেজত। থেবাক কেনে? ভূই আহ্রেলাক, বাগান আহ্রেলাক - আহ্রেলাক ঘর’ ভিদে; ইরুক দিনত, ইন্দি দে দ্য উন্দি দে দ্য পেদত ভাত ন’ পরে। আর্মির তচ্যা, বাঙালর তচ্যা - তচ্যা জাত ভেইয়োর; বুক বানিবার কি আঘে? এধক তচ্যা মাধাত গরি কেনে তরানা পরান। সিত্তেই তারা এ দেচ সারি ধেই যাদন । ত্যুঅ, আমার চেদন নেই? কিত্তেই এধক পাষান ভেই? নিজ’ কধা নিজে ভাবর, নিজ’ আলুত্যাই কি লাড়েই গরর? জাত্তোর আঘে আন্দারত। কারে নিনেই তমা এ লারেই?

 বোজেক্যা আগাজর কালা মেঘ সান  আক্কে দগিন মাধাত, কাক্কে উত্তুরে মাধাত,  কাক্কে পুগ আগাজত আ কাক্কে পজিম আগাজত;  ঝর মুয়ি রোদ মুয়ি নাধেংপত্তি সান তলে উগুরে সং ভুই,  কি মোন মুরত; বোজেক্যা শেমেত তুল বোইয়ে উড়ানা সান  গোদা সঙসারত ছিদি বেড়ায় মর বুগর অতালিয়ে সবন।  নেই কন সাল্যেঙ(গন্তব্যস্থ)  নেই কন ধুজি(সীমানা) বানা ঘুরি বেড়ায়  তরে পেবার অাঝায়।

কি আর লিঘিম? মুহত ভাচ নেই।  কি আর লিঘিম?  কলম ধরি ন পারঙর হাদ ঘিরঘিরার।  কি আর লিঘিম?  চোগ পানিয়ে কিচ্ছু ন দেঘঙ।  বানা রণ কাবে,  রিবেং গুজুরে।  চোক থেনেই কান,  কান থেনেই কাল, মু থেনেই বুব। আমি কি মানুচ? মানচ কলে ঈশ্বর বেজার। অ মানুচ কলে তুই বেজার। বজ যেবং বজ যেবং, কন দিন ভালা ন অবং। যুনি ন বদলেই আমা হাজ্জেয়ানি। ১৭ মার্চ ২০১৭

পহ্'র ছিদিবো আঝায় বেন্যা বেলান উদে, রেত অভ আঝায় আগাজত লক্ক কোটি তারা জ্বলন, দুখ্যে মানেইয় মনত খুজি ফুদেবার আঝায় পূর্ণিমা জানান উদে, ফাওন এভ আঝায় গাজে গাজে ফুল ফিদন বিঝু এভ আঝায় কোকিল্লো দাগে। মাত্তর! ত কধা বিশ্চেচ গরি কোচপিয়োঙ তরে, সবনানি নিত্তো তচ্যা লাঘায় মরে।

ও ও ও পরান্নো শুননা তুই ম কধা, ত' লেক্কে কবিদ্যাবো পড়ি নেই জন্মেল এক্কান দাঙর মেয়্যা। ২ লেঘিলে তুই সংসমারে গরিবং দেঝর জাদ কাম, জেধক দিন বাজি থেবং থেবে তুই ম কায়।ঐ ঝর এঝোক বোইয়ের এঝোক আহ্'দিবং সংসমারে পিত্তিমীআন গলি গেলেও ন ছারিম তরে।২ সংসমারে আহ্দিবং বিজক বানানা পদে, পিত্তিমী মানেই লগরে দেঘেবং জাদ কামত কেনে মরে।ঐ জাত্তো ভারি বেনালত তরে গরচ এ জাদর, মরিবং জাত ভালেদি কামত লেঘি যেবং নাঙানি থামা পাদাত।২ ধনপুদি অই তুই ম আহ্'দত তুলি দিবে আহ্'ত্যার, এ লাড়েত খামাক্কাই জয় আমার তুই থেলে ম কায়।ঐ ১১ এপ্রিল ২০২০

দিন বিদি জেই রেত এজে, ইক্যে গরি সাপ্তা, পক্ষ, মাচ বিদি জেই নুয়ো রঙে নুয়ো সাজে এল’ বিঝু আমা সিদু বিঝু মানে খুজি বিঝু মানে মিলনি বিঝু মানে সুক বিঝু মানে জাদর সিরিসুধোম বিঝু মানে বুদ্ধর অইংসে কধা বিঝু মানে রেগা মাত্তর মর আভিল্যাচ এধক- জাদর কধা কোই অধিগার কধা কোই আইনর কধা কোই শান্তি চুক্তি কধা কোই পূর্ণ স্বায়ত্তশাসন র কধা কোই নিজ’ সাহিত্য রিদিসুদোম কধা কোই নিজ ভাঝর কধা কোই নিজরে দাঙর ঘাদুবলা (গবেষক) ভাবি জু পেলে মানচ্ছোরে ঈচ গরি নিজরে দাঙর ভাবি। তে কিত্যাই লেঘি পর ভাঝে?

কিত্তেই কোচপাঙ তরে ও ইনজেব দা,  কোই পারচ নি?  মন কধা ভাঙি কলে কন লাজেবে নি? কোচপাঙ তরে ইনজেব দা বঝমান গুরি,  এককান কধা কবার আগে শুনিবে নি?  তুই থাচ দিঘীনালা মুই থাঙ লংগদু,  কয়েকদিন পর বেরেমবি,বৌ রাগেচ ত ইদু।  দিনপুত্তে ইদোত উদে তরে পরাননো   কিঙুরি বাজিম তরে নপেলে,সারাজনমমো?  ত বুগত রাগেচ মরে ফেলে ন যেচ কনদিন, তরে মুই ইদোত রাগেম বাঝি থাং যেদকদিন। রাঙা কালা পিনোন কাদি পেনেনেই বৌ নেযেচচি মরে, চাঙমা জাদর ভালেদত্তেই কাম গরিম মুই ত সমারে। দেচ জাদ লেগাপড়া,গরিবং তরলোই চিদেচজ্যা, যাদি বৌ নেযেচচি মরে,ও ইনজেব দা। অগুর সাগরত পেলে নযেচ মরে, দুগত থেম বঝমান,ত কায় থেবার চাং মুই গদা জনমান। মামা দাগি বৌ ন দিলে এমবে মুই ত কায়, আরও তুইও পেলে নযেচ,থেই নপারিম গাই গাই। এবার কোই পারিলে ইনজেব দা কিত্তেই কোচপাং তরে?  বুঝেবার চাঙর তরে আঙ্গারে ইঙ্গিতে।

রাঙা গরি বেলান উদে পুগ’ মোন সেরেদি কাম্মো লগে কামত যান আঝায় বুক বানি। কধক সবন, কধক আঝায় বাগত ধরন তারা দিন জাদে ঈয়োত জায় তরুনো অয় ত্যুঅ বুগ’ আঝা। ঝরে ভিজি, রোদে পুরি আহ্’জি ন’ সরে মুয়োত আহ্’লুল্লোই দুলুল্লোই অতালিয়ে কোচপানা আঘে মানেই জীংকানিত। এ জীংকানিত্তু আহ্’ঝি জেলে ও নাগরো তুই সবন দেঘেই সবন ভাঙিলে কি আর কোম মুই! তুই কি খবর পাচ- কেঝান আঘং মুই? খরান্যা কবা সান ভগঙর, এ মুরত্তুন ঐ মুরত আঝা-সবন ইধোত গাদেই জনি পাং তরে লাগত। বর্ষা চাঙমা ভঙদ্যা ভঙদ্যা লাগত পেলং- সিবে কন মিলে? চুল বেড়েই চেলাঙ গরি পরি কল’, মুই তর নাগরো। কধা বাত্তায় চাল চলনে ন’ দ’ পাং ত সান, বারবাঙারে তুদি গরি কয়- বাপ্পো আ মাগুলোরে চিত পুরিনেই ফিরি এই বদলেলং ছলআন। তরে মুই বিশ্চেচ জাং, বিশ্চেচ জাং ত মুয়ো ভাচ জাদর সবনানি গরিবং তজিমপুর জনিও অয় পিত্তিমী নাচ। দি জনে এবার আমি গঙারে দিবগোই ভাত জোরা মরিলে মরিবং সমারে কন’ জনে ন’ পেই কারর পোরা।

বাপ - ভেই, ম-ভোন লক !    তুমি নুয়ো মন মানসিকতা অথাত এম এন লারমা নীতি আদর্শ লোই জাগি উদ।তোমার দরেবার কিচছু নেই , তোমা লগে হিলর মানেউন আঘন । তুমি পোতপোততে বোম্বা আহ্’দ ত লোই মুজুঙে আককোই জ’। তোমারে কন’ জনে দোঙে ন ' পারিবাক।জয় তোমার খামাক্কাই অভ’। তোমা জাদর মানেউনর জীবনর দুগ , পেরাশানি , তচ্যা , আঝা , সবন জিংকানি লারেই , জয় পরাজয়   বেক আমল গরি ভাবিবার অক্ত এস্যে।তে জাগী উদ’ । জাদর মরন কাভুক কাপ্তে গদাআনে কা রি নিল জাদর সুক - শানতি । ভাঙি দিল মনর অতালিয়ে সবন । অলং ছিত্তিরিং পাত্তারাং। পুত্তো-পারা অই ছিদি পচ্যেই নেপা , বারমা , মিজোরাম সুমুত্ত কোণা কুণি , গোনা গুণি ছেরে ; নানাঙ কিত্তেত । মা ' আহ্’রেল তা ' আওজর পুঅ , বাপে আরেল তা ' আওজর ঝি । ইক্যে গরি নেগে মোকে পারক অই বাকী জীংকানি বুক দিবেদিপ্যা , বে - সুনজুক গরি , এক বুক আভিল্যাচ্ছোই দিন কাল তোরে পিয়ন , তোরাদন । ইয়ান আমা চাঙমা জাদর বাস্তব চিত্র । কালা বিজক । এচ্যে যারা দেচ কুলত আঘি খুউব গম নেই , তিগু...

জীংকানি দিঘলী পত কারর সুগর নয়। সুক দুক আহ্’জি কানানা নিনেই মানেই জীংকানি। জীংকানি ভালেদ’ পধে আহ্’ধি যাদে গধেল গধেল মোন-মুড়, তারেঙ-রিঝেঙ আ আরাচাক দি’ খুচ ফেলে যা পরে। কন’ জন সাল্যেঙত লুমন আ কন’ জন সাল্যেঙত লুমি ন’ পারানা আহ্’ল পাগল ওই আধা পদত বাক থুম গরন। এ আগাথ্যা পদে এক বুক সবন-আঝা নিনেই অনসুর মুজুঙে আক্কোই যান বুগর আঝা বোম্বা জালেই। এ চান-তারা, দিন-বেল মা মেদিনিরে সাক্খী রাঘেই কঙর- চিজি, তরে কায় রাঘেই এ জীংকানি পার গরি আর’ এক জীংকানিত তর ওই জনম লোম। পোতপোত্যা জুন’ পহ্’রত ইজোর মাধাত জিত্তো কাবিলি করত পরি এ কধান কল’। জিত্তো কধা নাল আধেই কাবিলি কল’- দাধা, পিত্তিমী নাঙে গ্রহবোত যারে নিনেই জীংকানি গমে দিবার অতালিয়ে সবন আঘে সে বান্দাবো অলে তুই। তুইয়্য কধা দে এ পিত্তিমী গুলি গেলেয়্য আমা এ সত্য আন গুলি ন’ যেব’।  সে রেত তারা দি’  জনে লগর সমারী অবার তিন সত্য দি দি গরলাক। আ সে রেত এল’ তারার এক্কো ইধোত গাদে রাঘেবার রেত। যক্যে পোত্তে আমল পুরি এল’ রাদাবো দাক কারের আ ভান্তে শিলে কর তারা দি’ জনে ফারক অই যা ঘরত তে গেলাক। জিত্তো রাজনীতি গরে। বালক বঝর বিদি যানা পর দিন মাধান এক্কা গম ওই এলে ...