শিলুন্যা আদামত চাঙমা লেঘা শেঘানা পোইদ্যানে এক্কো তেম্মাঙ খলা অই যিয়ে:

 সুনানু সুকেশ চাঙমা , সাবেক্কং এওজি, চাঙমা সাহিত্য: সাবেক্কং নান্যাচরর সাবেক্কং ইউনিয়ন শিলুন্যে নাঙে আদামত এচ্যে চাঙমা লেঘা শেঘানা পোইদ্যানে আদামর মাস্টর আহ্ মুরব্বীদাঘিলোই এক্কো তেম্মাঙ খলা অই যিয়্যা।

তেম্মাঙ খলাবো কধা পুচ্চোনিত এল’ চাঙমা সাহিত্য বাহ্ পত্রিকা সাবেক্কঙ ইউনিয়নর এওজি সুনানু সুকেশ চাঙমাদাঘি।মুলুক গর্বা ইজেবে এলাক্ আদামর্ প্রাইমারি স্কুলর হেড মাস্টর সুনানু সজীব চাঙমাদাঘি আহ্ ইউনিসেফ স্কুলর মাস্টর-সুনানু জমায়া চাঙমা আহ্ সুনানু রেমি চাঙমাদাঘি। দাঙর গর্বা ইজেবে আদামর কার্বারি সুনানু অনুনয় চাঙমাদাঘি থেবার আওচ গরলেয়্য থেই নপারে। তেম্মাঙ্ খলাবোর খলানানু ইজেবে আজিল এলঅ’ চাঙমা সাহিত্য বাহ্-নান্যাচর ধেলা ভান্ডালি কাবিদ্যাঙ সুনানু কাহিনী চাঙমাদাঘি। তেয়্য এ খলাবোত খলানানু।

আর’ আজিল এলাক্ আদামর মুরোব্বীলক্ আহ্ আদামর গাবুজ্যালক্। তেম্মাঙ খলাবোত বেগে মনত্তুন ছাগি তুলি কলাক “চাঙমা লেঘা, জাদর লেঘা শিঘানা সাতকাম।

খলানানু কাহিনী চাঙমাদাঘি কলাক,"করোনা দঙ্গাপিরে চলানায় স্কুল-কলেচ্ছানি বন্ধ আগে, সে ভিদিরে বেক্কুনে আমি আদামত আগি, আমা আদামত ইক্কে করোনা পিরে বলা মানুচ নেই । সেনে ইধু আঘিদে সময়ানত যুনি আদামর আওজিলক্কুনোরে চাঙমা লেঘা শেঘে পারিই সিয়ান আমার জাদর, সমাজর দাঙর মঙ্গল অভ।

এ কধা শুনি মাস্টর আহ্ মুরোব্বীলক্কুন বোঝান খুজি উয়োন আহ্ তারা জা জাগাত্তুন যা পারন এজাল্ দিবাক আহ্ চাঙমা লেঘা শিঘদে মান্যেরে উচ্চোমি তুলি দিবার বিলি জানেয়্যন। কধা অইয়ে,  এজেত্তে শুক্করবারেত্তুন ধরি শেঘানা কাম ফগদাঙ্ গরা অভ’। শিঘানাত্ পোরবো ইজেবে স্কুলঅ্ গুরোত্তুন ধরি গাবুজ্জে-বুড়ো বেক্কুনে সরিত অই পারিবাক্। শিঘানা কাম থুম অলে পুরিক্খে লোনেই পাশ গরিলে চাঙমা সাহিত্য বাহ্-তপ্পেত্তুন সার্টিফিকেট দিয়া অভ’।

শিঘেয়্যা মাস্টর ইজেবে থেবাক্ :

১.সুনানু কাহিনী চাঙমা

২.সুনানু বিকল্প চাঙমা

৩.সুনানু ললিতা চাঙমা

৪.সুনানু সুকেশ চাঙমা

৫.সুনানু তুষি চাঙমা