 |
ছবি: ফেসবুক
|
বানা
একবার দেঘা সে নাকশা লগে সুবুলর। নাকশা প্রেমত পরি যেল সুবুলে। রাঙামাত্যা কলেজত পড়ে
সুবুল আ নাকশা খাগাড়াছড়ি কলেজত। এইচএসসি ২য় বর্ষ, এ বঝর পরিক্কে দিবাক। মাত্তর, কভিড-১৯
বা দাংগা পিড়ে করোনাত্যা গেল্লে ১৮ মে ২০২০ ইঙত্তুন ধরি ইক্কুল-কলেজ বন্ধ। সরকারে দাংগা
পিড়ে করোনাত্যা লকডাউন দিল। এ জুয়োত তারা চাঙমা লেঘা শিঘদন। সুবুলে যুনিও রাঙামাত্যা
কলেজত পড়ে তা ঘর খাগাড়াছড়ি মোনতলা আদামত আ নাকশা ঘর দিঘল ছড়া আদামত। অদামানি কায়-কুয়
অলেও বেড়ান-চেরান ন’ থানার সেধক চিনপচ্যে নেই। দিঘলছড়া আদাম প্রাইমারি ইক্কুলত “চাঙমা সাহিত্য বাহ্” নাঙে এক্কো ভাঝা-সাহিত্য
উজন্দি গরিয়্যা জধা এক্কো “চাঙমা লেঘা সার্টিফিকেট
কোর্স” জুগল গল্লে তারা দি জনর চাঙমা লেঘা জু অয়।
এ
ক্লাজত যেনেই সুবুল পত্থম দেঘিনেই কি গম লাক্যে নাকশারে তে নিজে খবর ন’ পায়। ধগে দাগে
সানিচিক্যে আ বারা অজার, কমর চিপ যেন পরি মিলে সান লাগে। এ আগে কন মিলেরে কোচপানা দ’
দুরত, মিলে কায়ও ন’ যায়। ইক্যে নাকশারে দিঘি তা মনান নরম অই এল’। শামুক পরা চিবিদিসান
ধল্লে গরি মিলেল। সুবুলর মনান আর গম নেই। নাকশা দেঘি তা মনাত কি যেন কামাড়ে কামাড়ে
উদে। মনে মনে সবন বুনে নাকশারে নিনেই ঘর-সংসার গরিব। এধক্যে আঝা আ সবন তার কজমা বুগত
অনসুর তুবোল বেই যার।
সুবুলা
মা-বাপ চাগুরি গরিলেও নাকশা নাধা মানজোর ঝি, চের বোন তারা। ভেই নেই। কন বাবত্যা গরি
বেন্যা-বেল্যা ইদে পাদা ফেলাদন। বেগ দাঙরবো নাকশা। আ সুবুলদাঘি দ্বি ভেই বোন। বেগ দাঙর
বো সুবুলে। নাকশা যুনিও খাগাড়াছড়ি শহরত থেদ’ মাত্তর, তে অন্য মিলেসান বিরিকবারাক নয়।
নুদি ন’ গরে। সিয়ানি গম ন’ পায়। রাঙা গরি লিপ্টিক গুলনা, নানান বাবত্যা গরি সাজানা
সিয়ানি তে ন’ গরে। পিনোন খাদি বাদে অন্য কন’ ড্রেস উরিহ্-পিনিবার তার আওচ নেই। অনসুর
পিনোন পিনি থায়। সেনে তা সমাজ্যাউন তারে বুড় মিলে কোই কোই রজনা গরন। সে দিন, চাঙমা
লেঘা শেঘা যেনেই কালা পিনোন রাঙা খাদি পিনি যিয়ে। এ রাঙা খাদি আন দিলে বুক্কো এধক্যে
গরি জলে বেল‘ ছদক্কানও ধীমে ধীমে অয়।
চাঙমা
লেঘা ক্লাজত তারা দিজনে কায় কুয় গরি বজিলাক। মাত্তর, কধা নেই। বেল্যা ঘরত যেনেই সুবুলনে
নাকশা নাঙে ফেসবুকত তোগেই চাই মাত্তর, উদিচ গরি ন’ পারে তা নাকশা উব’। তা কেল্যা সুবুলে
বেগত্তুন আগে ক্লাজত যেল আ পল্যে যে জাগানত বলাক সে জাগানত বল’। তার আঝা নাকশা সে জাগানত
বব’। মাত্তর, নাকশা বেগ’ জেরে লুমনার তলেদি বোই পেল।
পরে
নাকশা খবর পেল সুবুলে তারে কোচপায়, বানা কি সুবুলে? নাকশারে কোচ ন’ পান কন’ গাভুজ্যা
নেই। নাকশা সিয়ানি বুঝি পারে। মাত্তর, নাকশা কারলোই লকফক (সম্পর্ক) অদ’ ন’ চাই। তে
ভাবে, বিএ পাস গরিলে বো চেলে বো যেম। কারলোই লকফক গরি নয়।
চাদে
চাদে থুম অল চাঙমা লেঘা কোর্স। মাত্তর, সুবুলে কোই ন’ পারিল নাকশারে কোচপানা কধা। যে
দিন কোর্স থুম সে দিন চাঙমা লেঘা মাস্টস্যা নাকশাত্তুন পুজোর গরের- “কিত্তে চাঙমা লেঘা শিঘর?”
নাকশা
কল’- “আমি এক্কো তজিমপুর জাত। আমার ওক্কোর
আঘন, ভাচ আঘে অর্থাৎ এক্কো তজিমপুর জাদর যা থানা দরগার সিয়ানি বেক আমার আঘে। যা পিত্তিমীত
দাঙর দাঙর জাদত্তুন নেই। মাত্তর, মুই চাঙমা
লেঘা ন’ পারং। চাঙমা অইনেই চাঙমা লেঘা ন’ পারানা এক্কান লাজর কধা। সেনে মুই চাঙমা লেঘা
শিঘঙর।”
এ
কধানি কধে চলাত ভিডিও গরা অয়্যা। বেল্যা চাঙমা সাহিত্য বাহ্ পেজত্তুন আপলোড দিলে ভিডিওবো
ভাইরাল অয়। বেগে চাঙমা লেঘা শিঘিবার আওচ আ উচ্চোমি উদি গেল। মাত্তর, দুগর কধা নাকশারে
কোচ পেদ আর এক্কো পুঅ। তে এক্কা এক্কা রাজনীতি ভেইল দিদ’। তা নাঙান বিজক। নাকশাদাঘি
আদামত্তুন। নাকশারে কয়েকবার বো চেবাত্যা তা মা-বাপ্পোনে খু ধরিলাক। নাকশা মা-বাপ্পুনেও
বৌ দিবার চান। মাত্তর নাকশা যদক্কন বিএ পাস গরি ন’ পারে তদক্কন বৌ যেদ’ ন’ চাই। নাকশা
তা মামারে কোই দিল’– “মরে বলে বলে বৌ দিলে
ম’ মরা মুয়ান চেই পেবা।” তা সে কধা তা মা বাপ্পুনে আওজি মনে গজি নিলাক। কিত্তে,
নাকশা অন্য মিলেসান সিবিলিক ছাবালাক নয়। আদামত প্রাইভেট পোড়ে পোড়ে তা খরচ তে গরে আ
বোনুনরেও খরঝর এজাল দের। ইক্যে তারে বৌ দিলে ডেন আহ্ত ভাঙে পা অভ।
চাঙমা
সাহিত্য বাহ্ পেজত্তুন পিয়ে ভিডিও বোত্তুন নাকশা ছবি এডিট গরি ফেসবুকত আপলোড দিল বিজগে।
এডিট গরা অয়্যা এক্কো বাঙাল্লোই ছবি উত্তে (সেলপি)। আ সিয়োত ক্যাপসন লেঘা অয়্যা- “এ
মিলেবোরে আগে ধরি ব্যাবস্থা ন’ গরিলে বাঙালে সমারে ধেই যেব।” এ এডিট গরা ছবিবো এমন শেয়ার আ কমেন্ট গরা অয়্যা কারর
চোগত ন’ পরে কন’ মানুচ নেই। ত্যুঅ খবর ন’ পায় নাকশা। কিত্তে, তে ফেসবুক ন’ লারে। ফেসবুক
সুলি খান না পুরি খান খবর ন’ পায়। তার কন ফোন নেই। তা বাবা ফোনান্নোই কাররে দরগার থেলে
কধা কয়। এধক্যে এক্কো মিলেরে ফেসবুগত ভাইরাল অনা সুবুলে বিশ্চেচ ন’ গরে।
সে
দিন্যা বেল্যা মাধানা নাকশা কুও গাঙত গেল। তার আগে কয়েক জন সমাজ্যা কুও গাঙত যেলাক।
তারা কোই-কি গত্তন- “নাকশা ভিলে এক্কো বাঙাল্লোই
প্রেম গরের।” আর’ একজনে কয়- “নাকশারে
দ’ সেধক্যে ন’ লাগে।” তারাতাঙুরি আর একজনে কল- “ফাপাক্যে মানচ্যে জাল মারে সুধু
আহ্ত্যা এযে, নিম্মো মানচ্যে জাল মারে ধুলত ভরে আনে।” ইয়ানি নাকশা শুন্নে।
নাকশারে দেঘি এক্কা ধীমে ধীমে অলাক। নাকশা পুজোর লল’- কি কোই গরর নিনা বোন? একজনে কল-
“তুই ভিলে বাঙাল্লোই প্রেম গরত্তে বোন।
ফেসবুকত ত’ ছবি ভাইরাল অয়্যা। সে কধা কোই-কি গরির।” কধায়ান শুনি নাকশা আগাচ
ভাঙি পরিল। ভাবিনেই কুল ন’ পার। কি অল’! মাত্তর, নাকশা মন বল আঘে তে কারলোই এয’ ছবি
ন’ উদে। কারলোই প্রেম ন’ গরের। যুনিও মান বল থায় মাত্তর, তা সমাজ্যাদাঘিলোই আর কন’
কধা কোই ন পারে। জোপ বন অই এল। জীবন সেধক্যে কধা এয’ ন’ শুনে। এচ্যে শুনিল’। ধাবা ধাবা ঘরত এল’। তা মামা তা ধক বুঝি পাচ্যে। তা
বাবে শুন্নে সে কধা। বিজগে এক ঝাক গাভুজ্যা পাদেল। তারা কলাক্কি তা ঝিবো বৌ দিলে যাদি
বৌ দোক। ন’ অলে দাঙর লাচ পেব। নাকশা বাবে বিশ্চেচ যেই ন’ পারে। কিত্তে, তা ঝি খবর তে
পায়। মানচ্চো সান কন’ তিনেংপালাং নয়। এ যাবত কন’ মরত্তোই কধা কধে চোগত ন’ পরে। তা দগে
তে থায়। পরে তারে সে ছবিবো দেঘেলাক। দেঘিনেই আমক!
রাক
উদি গেল। নাকশা মারে দাগের। ইয়েন কি দেঘঙর নাকশা মা। সিত্তেই বো যা কলে বৌ ন’ যায়।
ইয়ানি গরিবাত্তে। নাকশা আর দেরি ন’ গরি এক্কান দাঙর কাজি লোই কুও গাঙ মুখ্যে চুর গরি
ধেই যেল। ইন্দি নাকশা আ নাকশা বাবে কোজ্জে বাজেলাক।
বিজগে
দুরত্তুন তারার কধা শুনি আঘে। মনে মনে ভাবের এবার বৌ যে পেবে। মরে লোই পেবে। কুধু যেবে
এবার নাকশা। মুই বাদে তরে কন জনে ন’ লবাক।
ইয়ান
গচ্ছে বিজগে। কিত্তে, তে ভাবে নাকশালোই সুবুলে প্রেম গত্তন। ইয়ান যুনি ন’ গরে তে নাকশা
ন’ পেব। সুবুলররে লব। সুবুলর মা-বাপ বেক চাগুরি বলা।
বেল্যা
সাচ লামি রেত অল’। নাকশা এয’ দেঘা নেই। বেগর সন্দেহ বাঙাল্যালোই ধেই যিয়ে। মাত্তর,
বানা নাকশা মা বিশ্চেচ ন’ গরে, নাকশা বাঙাল লব’ ভিলেন। কিত্তে, নাকশা তা মামালোই বেক শেয়ার গরে, তা সবন
কধা কয়। বেগে তগাদন নাকশারে। বেগর এক্কান কধা নাকশা কুধু যেই পারে? বেক জাগানিত ফুরমারিলাক।
নেই কন জাগাত ন’ পেলাক। রেত গমি যেই পহ্’র অল’। নাকশা দিবে বোন গাঙত যেনেই এক্কো গাঝত
তারার বেবেহ্’রে তাঙা তাঙা গরি দিলাক। নাকশা সে লাজত্তুন বাজিবাত্যা তার দোল,সবন-আঝা
থুম গরি দিল।
তে
এক্কান চিদি লেঘি যিয়্যা-
মা,
আহ্’ভিল্যাচ ন’ খেইয়ো। তোমার আর’ তিন্নো ঝি আঘন। তারারে নিনেই তমা সবনাননি তজিম পুর
গরি পারিবা। এ সমাচ মরে জাদর সবন আ তমা সবনানি পত্থমে গরিবার ন’ দিল। এ সমাজত গমত জাগা
নেই। মিজে বতনাঙ পানাত্তুন মরি যানাআন গম। সেধক্যে এক্কান মর চিদে বুগত সম্যে সেনে
তমা কোচপানা বুগত গরি মুই পর পারত যাঙর মা।
ঝু
ঝু
তমা
কলঙ্গিত
নাকশা
