Wednesday, August 12, 2020
লাজর
কধা,ভাবিবার কধা। কধেও লাজ গরে পারা। ত্যুঅ কোই পরের। গেল্লে ০৭ আগস্ট
২০২০ ইং পরম স্বর্গীয় সুনানু বিভূতি চাঙমার(শিক্ষক) সাপ্তাক্রীয়া কেজ্জো
পোইদ্যানে দাঙর এক্কো ধর্ম সভা অই গেল’। এ ধর্ম সভাত সুনানু ভদ্র সেন
চাঙমায়্য অন্যজনর সান গরি সরিত অয়্যা। দিবুজ্যে মাধান কাচালং সরকারি কলেজর
প্রভাষক সুনানু লালন কান্তি চাঙমারে কাচালং বালিকা হাই ইক্কুলর প্রধান
শিক্ষক স্বপ্রচারিত কবি সাহিত্যিক পুন্ডিক ভদ্র সেন চাঙমা (সহ
সভাপতি,আদিবাসী লেখক ফোরাম ও উপদেষ্টা চাকমা কালচার কাউন্সিল বাংলাদেশ) এ
ধর্ম সভাত কাচালং সরকারী কলেজর প্রিন্সিপাল আ সসাগজ্যে মানি গরবা গরবি
মুজুঙে কাচালং কলেজর প্রভাষক সুনানু লালন কান্তি চাকমার উগুরে আহ্’ত
তুল্যে। যা ভাবদে বঃনিঝেচ এযে,অগলা এযে। যে নিজরে মহাপুন্ডিক মনে গোরিনেই
ফেইচ বুগত সমানে পোষ্ট দেদে দেগা যায়। পিত্তিমীত কন’ দেঝত,কন’ জাদর সাহিত্য
জগদত এধক্যে ঘদনা দেঘা ন’ যায়,শুনা ন' যায়। মাত্তর! ইনিক্কেন লাংদা কাম
চাঙমা জাদত দেঘা গেল’ গেল্লে ০৭ আগষ্টত। ইক্কো হাই ইস্কুলর হেড মাস্টরর
ইনিক্কেন বজং কাম কন' সভ্য সমাজত অবার ওই ন' পারে।
২০১৪ সালত রাঙামত্যা জেলা বাঘাই ছড়ি
উপজেলাত ৬২ জন সাবাঙ্গী নিনেই “আরাং” নাঙে এক্কো সাহিত্য জধা থিদ অহ্’য়।
সুনানু লালন কান্তি চাঙমারে সভাপতি আ সুনানু ভদ্রসেন চাঙমারে সাধারণ
সম্পাদক ইজেবে আরাঙর জধাত নকবাচ গরা অয়্যা। লাম্বা চের বঝর সং আড়াঙর কাম
বন্ধ থানার পর গেল্লে ০২ আগস্ট ২০২০ ইং সুনানু ভদ্রসেন চাঙমা ফেইসবুক টাইম
লাইনত দেঘা যিয়ে- “আরাঙর জনম পোইদ্যানে এগত্তরি। নুঅ জনম, নুঅ সবন, নুঅ
মানুচ, মন ভরন” ক্যাপশন দিনেই ১২/১৩ জনর দ্বি’বে আরুক/ছবি। কধা কোনেই খবর
পা যেল’- আরাঙর যে ৬২ জন সাবাঙ্গী/সদস্য আঘন তারালোই কন’ কধা নেই, তেম্মাঙ
নেই গরি যে নুঅ আড়াং জনম দেনা তারা কন’ সাবাঙ্গী/সদস্য মানি নেযে ন’
পারানার পোইদ্যানে সুনানু লালন কান্তি চাঙমা সংগঠনত সভাপতি ইজেবে সুয়োল
গরিলে সুনানু ভদ্র সেন চাঙমা তার উগুরে আহ্’ত তুল্যে সে ধর্ম খলাবোত। সুনানু
ভদ্র সেন চাঙমা চাঙমা সাহিত্য বাহ্ সল্লাদার (উপদেষ্টা) থানা সময়ত “চাঙমা
সাহিত্য বাহ্’রে আরাং নাঙ দিবার এক্কান প্রস্তাব আনে। চাঙমা সাহিত্য বাহ্
কন’ সাবাঙ্গী মানি ন’ নেযানার সে প্রস্তাবয়ান গজি লোনা ন’ অহ্’য়। আ কিঝু
দিন আগেও চাঙমা সাহিত্য বাহত তে ভেজাল বাজেই দিবার চেইয়্যে। তা সমারে তাল
মিলেনেই সংগঠনর কয়েক জন কাবিল কাম্মো নিগিলি গেলাক। যিয়েন ভারী দুক লাগিবার
কাম ভিলি চাঙমা সাহিত্য বাহ মনে গরে।
খবর
পা যিয়ে, সুনানু ভদ্র সেন চাঙমা চাকমা কালচার কাউন্সিল অফ বাংলাদেশ
(সিসিসিবি-র) এ সল্লাদার পদত্তুন সরে এবার এক্কান কাগোজ পাদেয়্যা সংগঠনর
কমিতির গ্রুপত। তার পরে পরে সিসিসিবিত নানান ভেজাল থুম ন' অহ্’র।
এর
আগেও আদিবাসী লেখক ফোরামতও সুজালো জোস রে লোইনেই এক্কান দাঙর বেজাল
ওইয়্যে। তে আদিবাসী লেখক ফোরামর সহসভাপতি অনা সত্বেও সুজালোর ইন্দি বেরত
বাজে পারা বাজিনেই সিয়োতও তাল মাতাল কারবার গচ্ছে। কদ' জনে তার ইনিক্কেন
চাল বাজির কারনে আদিবাসী লেখক ফোরামত্তুন নিগিলি যিয়োনদোই। ইআনিত্তুন
বুঝা যায় সুনানু ভদ্র সেন চাঙমা যিয়ত সিয়োত শিয়েলর পাক চক্কর নিগিলানার
কাবিদ্যাঙ। তার এ গভীর ষড়যন্ত্র নিঘিলেনেই আরাঙর যে ৬২ জন সাবাঙ্গীরে কিঝু
ন’ কোই নুঅ “আরাং” থিদ’ গরিবার অ-কাম (ব্যর্থ প্রচেষ্টা) গরিল’। তা ফল
চাঙমা জাত্তো পেল লাজর/কলঙ্গ এক্কো দিন, ০৭ আগস্ট। ইক্কো আনকরা মানজ্যেও
ইনিক্কেন লাজর কাম ন' গরন। তার ইনিক্কেন বজং কামানি কি আদিবাসী লেখক
ফোরাম আ সিসিসিবি কেনে মানি লোই পারের? ইয়েন পুজার থেল'। এ লাজসান কেনে
ঢাগিব' চাঙমা সায়িত্য পুজার থেল' আদিবাসী লেখক ফোরামর ইধু। আমি ইত্তুন
নিগিলি এবার চেই, চেই দোল সাহিত্য সংস্কৃতি মানুচ।
কোন মন্তব্য নেই:
একটি মন্তব্য পোস্ট করুন